Rafræn auðkenning og barnaníð
Ég hef vitað í nokkurn tíma, eins og margir aðrir í mínum bransa, að rafræn skilríki eru við það að komast í almenningshendur. Bæði stjórnsýslan og bankarnir fá vart vatni haldið yfir því að þetta komist á sem fyrst. Reyndar eru einhver mál óleyst enn, en svo sem ekkert sem stöðvar þetta.
Ég er reyndar einn þeirra sem halda fram ágæti rafrænna skilríkja. Ég tel að þetta færi okkur margar nýjar leiðir sem áður voru ekki færar. Einkum þegar kemur að hlutum eins og viðskiptum og stjórnkerfi. Ég er þó frekar efins um ágæti þess að auðkenna alla alltaf.
Auðkenni eru greinilega að fara af stað í að kynna málið. Ég er þó hvumsa yfir frétt um málið á Vísi.
Nokkrir dómar hafa fallið hér á landi þar sem barnaníðingar hafa notað spjallrásir til að komast í samskipti við börn. Rafræn skilríki geta í framtíðinni komið í veg fyrir þetta.
Ég er tilbúinn til þess að trúa því að þarna sé á ferð fréttamaður að hjálpa til
við að matreiða þetta ofan í almenning. Sennilega er þetta þó arfaslakt praktískt dæmi sem talsmaður auðkennis er að taka fyrir í viðtali. Það skiptir eiginlega engu hvort er.
Mér verður hálf óglatt við tilhugsunina að barnaníðingagrílan sé notuð til þess að smala fólki út í þetta og þagga niður í mögulegum persónuverndar- og öryggismálaröddum? Þeir sem auðkenna sig alltaf ekki á netinu hljóta jú að vera barnaníðingar, hvað annað hafa þeir að fela?
Ég ætla að vera fyrstur til þess að segja opinberlega að rafræn skilríki og rafræn auðkenning eru engin töfralausn gegn barnaníð. Fræðsla og forvarnir eru líklegri til þess að hafa áhrif. Barnaníðingar munu finna sér aðrar leiðir.
Hvernig væri að við horfðum frekar á þá jákvæðu, og raunhæfu, möguleika sem rafræn skilríki bjóða upp á. Til dæmis mætti nefna að við losnum við auðkennislyklakippurnar sem allir hata, eða - hey! - þá staðreynd að rafræn viðskipti og/eða samskipti við stofnanir munu verða háð auðkenningum og að þeir sem ekki ætla sér að taka upp rafræn skilríki verða einfaldlega eftir úti í kuldanum.
4 ummææli við “Rafræn auðkenning og barnaníð”
Ótrúlega djörf fullyrðing.
Arnþór Snær skrifaði 28.11.2007 16:08
Ég hef nú svo sem aldrei verið neitt að hika við stórar yfirlýsingar. Ég ætla að giska á að þú sért að meina þennan spádóm minn um að bankarnir og ríkið muni í framtíðinni krefjast rafrænna auðkenninga; Frekar en að hér sé ekki á ferð töframeðal við barnablæti.
Ég vona auðvitað að ég sé ekki að fullyrða þetta út í bláinn. Ríkið og sveitarfélög bæði hér og erlendis hafa yfirlýsta stefnu í þessum málum. Ég veit ekki hversu harkalega þeir ætla að loka á þá sem annað hvort ekki geta nýtt sér þetta (sökum td. fötlunar) eða vilja. Ég held að það hljóti að vera ljóst að þar sem þetta opnar fyrir þann möguleika að X og Y sé framkvæmanlegt með auðkenningu, þá verði sú þjónusta háð auðkenningu. Í dag er rafrænþjónusta ríkisins ekkert stórfengleg, ef undanskilinn er skatturinn (sem er til fyrirmyndar), en þetta er að aukast.
Miðað við hversu hratt og fast bankarnir sóttu það að lyklarnir kæmust á þá kæmi mér það lítið á óvart að sjá þá ganga fast á eftir því að auðkenningar verði staðreynd. Þetta er samt bara mín framtíðarspá, það má vel vera að ég sé á villigötum með þetta.
Það sem vakir kannski helst fyrir mér með þessu rausi er að við sópum þessu barnaníðingakjaftaði út af borðinu strax svo að þegar alvöru spurningar komi fram um persónuverndar- og öryggismál tengd auðkenningum að það þurfi ekki allir sem tala um vandamálin að vera fylgjandi barnaníð, hryðjuverkum, eða hati Ameríku.
Ég efast stórlega um það að spjallkerfi, almennar vefverslanir, og annað þessháttar verði farin að krefjast auðkenningar næstum því strax. Ég sé ekki alveg hver hvatinn ætti að vera fyrir t.d. auðkenningu í netviðskiptum sem nú virka ágætlega. Tryggingafélög og önnur fyrirtæki sem vinna eftir þröngum lögum sjá líklega hag í þessu, en fyrir okkur hina... ekki svo mikilvægt.
Borgar skrifaði 28.11.2007 16:45
Get ekki séð hvernig rafræn skílríki hjálpa til við það, og að nota þennan vinkil til að selja þetta concept er að mínu mati siðlaust.
Fólk hefur ennþá það val að nota netið nafnlaust og mun eflaust gera í framtíðinni með aukinni WIFI væðingu.
Fólk verður td. ekki auðkennt á miðlum eins og MSN, Facebook, Myspace o.s.frv. með þessu.
Þessi auðkenni byggja á því að þjónustuveitandi ákveði að notast við þessi skílríki/auðkenni og er ekkert í lögum (mér að vitandi) sem segir að þjónustuveitandi verði að notast við rafræn skílríki til að auðkenna notendur. Og þó svo að það væri þá mundi það eingöngu gilda fyrir íslensk fyrirtæki og þar sem vinsælustu samskiptamiðlar í dag eru ekki íslenskir þá væri það fallið um sjálft sig.
Skamm skamm visir.is
p.s.
Losnar við auðkennislykilinn en færð USB kortalesara með snúru í staðinn + forrit til að setja upp á tölvuna þína - góða lyklakippan.
Snorri Páll skrifaði 28.11.2007 16:47
@Snorri: Akkúrat. Fínn punktur varðandi lögin. Lagalegi vinkillinn er nefnilega það sem þarf að skoða betur. Mér þætti það alls ekkert óeðlilegt ef sett yrðu á lög sem takmörkuðu eitthvað notkun auðkenninga. Rétt eins og notkun kennitalna er takmörkuð. Þetta er auðvitað háð því að umræðan verði á einhverju vitsmunalegu stigi. :-)
Borgar skrifaði 28.11.2007 16:56